LILOAN, CEBU-Nasikop sa mg awtoridad ang mga lalaking illegal nga nanigbakay sa Sitio Kainoc, Barangay Santa Cruz sa lungsod sa Liloan niadtong Biyernes sa hapon, Pebrero 21, 2025.
Ang maong operasyon kay gipangulohan sa mga sakop sa Criminal Investigation and Detection Group (CIDG) Mandaue City Field Unit diin nakasikop kini sa dili muminos 13 ka mga indibidwal.
Gani misuway pa kini og ikyas ang mga lalaki apan nadakpan ra gihapon kini sa mga sakop sa kapulisan.
Gikatahong gikan pa sa mga silingang lungsod sa Consolacion ug bisan sa dakbayan sa Danao ang mga dinakpan diin nagpangidad kini gikan sa 20 hangtod sa 60 anyos.
Sa mismong operasyon, naka-confiscate ang mga tinugyanan sa balaod sa mga manok panabong, itom nga bag diin sulod ang mga gambling paraphernalia, og P6,300 nga betting money.
Gibuhat sa mga awtoridad ang operasyon nunot sa mga nadawat nga mga report sa illegal nga sabong sa maong dapit diin gilusad dayo ang Oplan Bolilyo program sa mga ahente.
Kasamtangang anaa karon sa kustodiya sa CIDG-7 ang mga dinakpan aron sa pagpaabot sa mga kasong ipasaka batok kanila nga kalapasan sa Presidential Decree No. 449 o ang Illegal Cockfighting and Gambling.
