CEBU CITY-Pa-imbestigaran ni Lapu-lapu City Police Office (LCPO) Director Police Col. Carlito Baja ang nahitabo nga matud pa pagpangulata sa iyang mga pulis ngadto sa mga miyembro sa fraternity nga Alpha Kappa Rho (Akrho) sa may Lapu-lapu City Market niadtong Nobyembre 16, 2019.
Sa ekslusibong pakighinabi sa Bombo Radyo Cebu kang Baja, giingon niini nga wala pa niya nakita ang video apan iya kining paimbestigaran kung unsa ang tinood nga nahitabo.Apan gitino sa director nga nakadawat sila og alarma gikan sa naasoy nga lugar nga duna matud pa’y gubot nga nahitabo ug ang mga pulis nga nakita sa video ang igo lang mi-responde.
Sigon pa usab ni Baja nga dili matud pa mahimo nga basihan lang ang video gumikan kay wala man makita ang sinugdanan sa panghitabo hinungdan nga iya kining paimbestigaran. Apan giklaro usab niini nga kasohan nila ang mga nadakpan.
Sa nasayran gidakop ang usa ka lalaki nga wala pa matino nga maoy nakita sa video nga gidakop na samtang milabay ang duha ka Akrho members.
Lakip sa nasikop ang presidente sa Akrho nga si Paul Jay ug ang kauban niini. Gitino usab sa naasoy nga grupo nga dil nila kaila ang unang gidakop sa mga pulis.
Padayon usab nga gikab-ot sa Bombo Radyo ang habig sa mga pulis nga nakita sa video kinsang nasuta nga nadestino sa Police Station 3 ubos sa hepe nga si Police Major Wayne Magbanua. Abli kanunay ang sibyaanan sa ilang habig sa pagtubag kung tinood nga ang nangulata usa ka miyembro sa Tau Gamma Phi.
