Dili ang Senate Committee on Women, Children, Family Relations ug Gender Equality ang mohukom kang Pastor Apollo Quiboloy kung sad-an ba kini o dili.
Mao kini ang tubag sa lider sa Kingdom of Jesus Christ sa mga akusasyon nga gipasaka batok kaniya sa kanhing mga miyembro sa ilang relihiyon.
Matod ni Quiboloy, kinahanglang motestigo ang victim-survivors sa korte bahin sa ilang mga pasangil aron makadepensa siya sa iyang kaugalingon.
Gitawag pa sa pastor nga “trial by publicity” ang imbestigasyon sa komitiba kay matod niya wala silay resource person sa hearing tungod kay ang mga nisumbong lang kaniya ang gipagawas sa Senado.
Hinuon hugot nga gipanghimakak niini nga walay basehanan ang mga seryosong pasangil batok kaniya sama sa sexual abuse ug uban pa.
Apan, sa habig ni Sen. Risa Hontiveros, normal lang nga manghimakak ang mga akusado tungod kay kini maoy ilang paagi sa paglikay sa legal nga responsibilidad.
