Nipagawas og bag-ong mga subpoena ang Senate impeachment court para sa duha ka kanhing branch manager sa Land Bank of the Philippines nga motambong isip mga saksi sa pagpadayon sa impeachment trial ni Bise Presidente Sara Duterte sa sunod semana, Miyerkules, Hulyo 29.
Kini may kalabotan sa Article I sa Articles of Impeachment, nga naghisgot sa giingong sayop nga paggamit ni Duterte sa kinatibuk-ang P612.5 milyon nga confidential funds, ug lakip na ang P500 milyon gikan sa Office of the Vice President ug P112.5 milyon gikan sa Department of Education (DepED).
Sumala ni House Lead Prosecutor Gerville Luistro, si Constantino ang unang ipresentar isip saksi, ug gisundan kini ni Camposano.
Samtang sa dihang gipangutana ni Defense counsel Mark Vinluan kung labaw pa sa usa ka saksi ang motambong sa sunod nga hearing, si Escudero miingon nga ang subpoena i-isyu para sa duha ka saksi aron ang tanang habig maandam.
“Maghahanda tayo para sa dalawang saksi sa araw na iyon,” giingnan ni Escudero ang Defense panel.
Niadtong Martes, Hulyo 21, gibawi sa korte ang miaging subpoena nga gi-isyu alang sa duha ka kanhing representante sa LandBank samtang ang cross-examination kang National Bureau of Investigation (NBI) Director Melvin Matibag nagpadayon niadtong Miyerkules, Hulyo 22.
Ang impeachment trial magpadayon sa Hulyo 29, alas 10 sa buntag, human sa ikalimang State of the Nation Address (SONA) ni President Ferdinand Marcos Jr. sa Hulyo 27 ug ang gikatakdang “Counter-SONA” sa mga minority senators sa sunod nga adlaw.
