Nagplano ang impeachment court nga magtudlo og tulo hangtod lima ka mga legal expert isip amici curiae o “friends of the court” aron motabang sa pagsulbad sa hisgutanan bahin sa pila gayud ka boto ang kinahanglanon alang sa pag-abswelto o pagpasilot batok kang Bise Presidente Sara Duterte.
Mihatag og update si Senate President Sherwin Gatchalian nga ang mga retired Supreme Court justices ang nag-unang gipili sa maong mga eksperto, bisan wala pa’y pinal nga gitudlo alang sa ilang pag-atubang sa korte sa Septyembre 16.
Sumala pa ni Gatchalian, naghangyo ang hukmanan og mga suhestiyon gikan sa matag kapikas, ang prosecution ug defense, samtang gihatagan usab og awtorisasyon ang presiding officer nga makadapit pa og uban pang legal advisers.
Nagsugod ang maong hisgutanan bahin sa threshold sa boto human mangutana si Senador Erwin Tulfo kon tugotan ba gihapon nga makaboto ang mga senador nga wala nakatambong sa mga hearing.
Gipasabot ni Tulfo nga ang iyang tuyo dili ang pagpaubos sa gikinahanglan nga boto, apan aron maklaro kung ang mga absent member ba iapil sa ihap, tungod kay bisan kung sila iapil o giisip nga nag-abstain, kini isipon gihapon nga boto alang sa acquittal.
Nagpasidaan usab siya nga kon mokunhod ang gidaghanon sa mga boto nga gikinahanglan alang sa kombiksyon, mokunhod usab ang gidaghanon sa mga boto nga gikinahanglan aron maabswelto ang bise presidente.
Tungod sa kabug-at sa isyu, si Presiding Officer Sen. Francis Escudero mipahayag nga ang impeachment court unang maminaw gikan sa mga eksperto sa balaod sa Septiyembre 16.
Pagkahuman niini, ipahigayon ang oral arguments tali sa prosekusyon ug sa defense sa Septyembre 23, diin sundan dayon kini og pagboto sa mga senador aron pinal nga madesisyunan ang sakto nga voting threshold.
