Gilauman nga mahuman sa Senado ang bahin sa kaso sa impeachment bahin sa giingong grave threats ni Bise Presidente Sara Duterte sa dili pa matapos ang buwan sa Hulyo.
Sumalani Senate impeachment court spokesperson Atty. Reginald Tongol, mas paspas ang proseso human gibawi sa prosekusyon ang pagpresentar sa unom pa ka mga saksi alang sa Artikulo 4 sa impeachment complaint.
Tungod niini, gilauman nga mopadayon ang husay sa sunod nga alegasyon, ang giingong sayop nga paggamit sa confidential funds sa Office of the Vice President (OVP) ug sa Department of Education (DepEd).
Sa Artikulo 1 sa impeachment complaint, si VP Sara giakusahan sa giingong paglapas sa public trust ug graft and corruption tungod sa giingong sayop nga paggamit ug liquidation sa kinatibuk-ang P500 milyon nga confidential funds sa OVP ug P112.5 milyon gikan sa DepEd, ug ang prosekusyon nangandam na sa pagtawag og tulo ka mga saksi alang niini nga butang.
Diin lakip niini sila si Marivic Pareja sa Legislative Archive Museum sa House of Representatives; Violeta Constantino, kanhi manager sa Landbank Shaw Boulevard branch; ug Leonita Camposano, kanhi manager sa Landbank DepEd branch.
Sumala ni Senate President ug presiding officer Chiz Escudero, tapuson una sa prosekusyon ang ilang presentasyon sa tanang artikulo sa impeachment sa dili pa magsugod ang depensa sa ilang ebidensya.
