Gibarugan sa Catholic Bishops’ Conference of the Philippines (CBCP) nga importante nga ang impeachment trial ni Bise Presidente Sara Duterte ipadayon subay sa Konstitusyon ug sa mando sa balaod.
Si Kidapawan Bishop Jose Colin Bagaforo miingon nga ang Simbahang Katoliko wala modapig o mokontra sa Bise Presidente.
Gipasabot niya nga ang tumong sa Simbahan mao ang pagsiguro nga ang rule of law masunod ug nga ang proseso sa impeachment moagi sa hustong ligal nga pamaagi.
Gipasiugda usab ni Bagaforo ang kamahinungdanon sa hustisya ug kamay-tulubagon sa mga opisyal sa gobyerno, ilabi na atubangan sa mga alegasyon sa korapsyon.
Miingon siya nga ang mga lider sa nasud kinahanglan nga manubag sa pagsalig nga gihatag kanila sa katawhan.
Samtang, giila usab sa CBCP nga ang mga Pilipino nabahin karon tungod sa lainlaing mga gituohan sa politika.
Tungod niini, nanawagan ang Simbahan alang sa panaghiusa ug giawhag ang publiko nga unahon ang kaayohan sa kadaghanan kaysa sa personal nga politika.
Sumala sa CBCP, magpadayon kini sa pagdala sa iyang papel isip “moral conscience” sa nasod samtang ang publiko nagtutok sa gipaabot nga mga proseso sa impeachment sa Senado.
