BOMBO EXCLUSIVE: Gipadayag ni kanhi Presidential Legal Counsel Atty. Salvador Panelo nga posible pa nga mapugngan ang impeachment trial batok kang Vice President Sara Duterte, bisan pa sa kadaghanan nga boto sa House of Representatives pabor sa pagpadala sa Articles of Impeachment ngadto sa Senado.
Sa eksklusibong pakighinabi sa Bombo Radyo news team, gipunting ni Panelo nga adunay mga pending petition sa Korte Suprema nga nagakuwestiyon sa legalidad sa proseso nga gihimo sa House Committee on Justice ug sa Kamara mismo.
Matod niya, usa sa mga isyu mao ang giingong pagpugos sa pagpakita ni VP Sara Duterte sa House of Representatives, bisan pa man sa iyang pagpatin-aw sa mga rason sa dili niya pag-apil.
Ikaduha, giingon usab niya nga ang kampo sa Bise Presidente mipadayag nga kung motambong sila sa hearing, dili gihapon sila tugutan nga makapangutana sa mga testigo, nga nagbutang og pangutana sa due process.
Ikatulo, giingon ni Panelo nga nag-isyu ang House og subpoena sa lain-laing ahensiya sa gobyerno aron makakuha og mga dokumento sama sa bank records, Bureau of Internal Revenue (BIR), ug uban pa, nga iyang giila nga mahimong naglapas sa balaod ug nagpakita og giingong “fishing expedition.”
Matod pa niya, sa prinsipyo sa impeachment, kinahanglan nga adunay kompleto nga ebidensya sa pagsumite pa lang sa reklamo, apan lahi ang nahitabo sa Kamara.
Gipadayag usab niya nga adunay tulo ka petisyon nga anaa karon sa Korte Suprema may kalabotan sa maong mga isyu.
Matod ni Panelo, mahimong gamiton sa pipila ka mga senador ang maong mga petisyon isip basehan aron dili dayon mag-convene isip impeachment court samtang wala pa makagawas ang pinal nga desisyon sa Korte Suprema.
Dugang pa niya, kung ideklarar sa Korte Suprema nga adunay depekto o iregularidad sa proseso sa impeachment complaint, mahimong maapektuhan ang validity of the Articles of Impeachment ug ang pagpadala niini ngadto sa Senado.
Busa, giingon ni Panelo nga posible lamang nga “masayang” ang panahon sa Senado kon mopadayon ang impeachment proceedings samtang wala pa maresolba ang mga legal nga isyu nga karon ginarepaso pa sa korte.
