Gihangyo sa usa ka abogado sa Korte Suprema nga ipawalay-bili ang desisyon sa Senate Impeachment Court kalabot sa isyu sa “voting threshold.”
Sa petisyon nga gisang-at ni Atty. Ernesto Francisco Jr., gihangyo niya ang Korte Suprema nga ideklarar nga “null and void” o walay bili ang bag-ohay nga mga proseso sa Senado.
Niadtong Setyembre 23, 2026, mibotar ang Senate Impeachment Court nga usbon ang “voting threshold” alang sa pag-abswelto o pagkonbikto sa respondent nga si Bise Presidente Sara Duterte.
Samtang, gisang-at sa abogado ang usa ka “petition for certiorari and prohibition,” nga naglakip sa hangyo nga magpagawas ang Korte og “status quo ante order.”
Gikanayon ni Atty. Francisco, tumong niini nga pugson ang mga partido nga mobalik o magpadayon sa sitwasyon nga naglungtad sa wala pa ang kontrobersyal nga pag-usab sa voting threshold.
Gipasabot niya nga wala siya nangayo og Temporary Restraining Order (TRO) isip pagtahod sa managsamang ang-ang sa gahom sa Judiciary ug Legislature.
Apan, naglaom ang abogado nga molihok ang Korte Suprema sa iyang petisyon kalabot sa isyu sa voting threshold.
Nangatarungan siya nga angay manghilabot ang Korte sa maong kontrobersiya ug klarohon ang mga probisyon sa Konstitusyon nga may kalabotan niini.
Nagtuo siya nga dili angay ipadapat ang desisyon sa Senate Impeachment Court bahin sa voting threshold inig-abot sa panahon sa pagdesisyon kon konbiktahon o absweltohon ba ang Bise Presidente.
Nagtuo si Atty. Francisco nga ang Korte Suprema lamang ang adunay awtoridad sa paghubad sa mga probisyon sa balaod.
