Gipahibalo sa Korte Suprema nga apektado ang Philippine Judiciary 365 (PJ365), lakip na ang Microsoft Outlook, sa nasinating global service disruption sa Microsoft 365 karong Biyernes, Nobyembre 13.
Tungod niini, nabalda ang pagdawat ug pagtubag sa mga email ingon man ang ubang mga transaksyon sa korte, hinungdan nga nakig-alayon na kini sa Microsoft aron mapasig-uli dayon ang mga apektadong serbisyo.
Sa kinatibuk-an, liboan ka mga tiggamit sa Microsoft ang nakasinati og mga pagkabalda human sa mga taho bahin sa kaylap nga pagkaputol sa serbisyo nga nakaapekto sa pipila ka mga software product niini.
Sumala sa third-party monitoring platform nga Downdetector, gibanabanang 130,000 ka mga tiggamit ang apektado sa maong problema partikular na sa Microsoft Outlook sa alas 2:00 sa kaadlawon karong Biyernes; mius-os kini ngadto sa 50,000 pag-abot sa alas 5:30 sa buntag.
Nakasinati usab og mga pagkaputol sa sistema ang ubang mga serbisyo sa software, lakip ang Microsoft Teams ug ang AI assistant nga Copilot.
Gipahibalo sa kompanya nga ang mga problema sa koneksyon gipahinabo sa “sobra nga karga” (elevated load) sa ilang imprastraktura sa nagkalain-laing mga rehiyon.
Lakip sa mga naapektuhan mao ang mga tiggamit sa Southeast Asia, sama sa mga propesyonal sa IT ug mga empleyado sa BPO sa Pilipinas.
Gipasalig sa Microsoft sa mga tiggamit nga ilang gitutokan ang maong problema ug gipangita ang tanang posibleng pamaagi aron maminusan ang epekto niini.
