Giinsistir sa kampo ni Bise Presidente Sara Duterte nga ang Quezon City Regional Trial Court kinahanglang morespeto sa umaabot nga desisyon sa Korte Suprema kalabot sa petisyon nga ilang gipasaka.
Matod ni Atty. Paul Lawrence Lim, ang abogado sa Bise Presidente, kung aprobahan sa Korte Suprema ang ilang hangyo, ang hingtungdan nga maghuhukom kinahanglan nga motahod sa maong mando.
Sa petisyon nga gisang-at sa Bise Presidente, mihangyo siya sa Korte Suprema nga magpagawas og Temporary Restraining Order aron ihunong ang dagan sa kaso ug kanselahon ang pormal nga sumbong nga gisang-at sa Department of Justice.
Bisan pa man nga nagsang-at ang Bise Presidente og “Urgent Motion to Resolve,” wala pay desisyon o resolusyon niini sa pagkakaron, ug nagpabilin kining nagbitay sa Korte Suprema.
Samtang wala pa makapagawas og desisyon ang Korte, gipahayag ni Atty. Paul Lawrence Lim nga ang desisyon kung ipadayon ba ang arraignment sa akusado anaa kini sa hurisdiksyon sa Regional Trial Court.
Nagdumili usab ang abogado sa pagbutyag sa mga espesipikong basehan nga gilakip sa petisyon nga gisang-at sa Korte Suprema, tungod sa gitawag nga “sub judice rule.”
Hinuon, iyang gipunting nga ang petisyon nagtumong sa pagkuwestiyon sa hurisdiksyon sa Quezon City Regional Trial Court sa mga kaso nga gisang-at batok sa Bise Presidente.
Nagbarog ang kampo sa Bise Presidente nga dili pa mahimong pasakaan og kaso ang akusado tungod kay ang usa ka opisyal nga mahimong ipailalom sa impeachment adunay katungod sa gitawag nga “limited procedural immunity.”
Kahinumdoman nga niadtong Biyernes, Oktubre 9, 2026, gi-postpone sa Quezon City Regional Trial Court ang arraignment ni Bise Presidente Sara Duterte tungod sa mga pending nga mosyon ug petisyon nga gisang-at sa iyang kampo.
Nag-atubang ang Bise Presidente og tulo ka ihap sa kasong “grave threats” (seryosong hulga) kalabot sa mga alegasyon nga hulga sa kinabuhi nila ni Presidente Ferdinand “Bongbong” Marcos Jr., First Lady Liza Araneta-Marcos, ug kanhi House Speaker Martin Romualdez.
