Andam ang British-Cebuano Gymnast nga si Jake Jarman sa bisan unsang posibilidad, ilabi na ang tanyag nga mosalmot sa Philippine Olympic Gymnastics team ug magdala sa bandila sa Pilipinas sa bisan unsang internasyonal nga kompetisyon.
Kini ang gibutyag sa iyang inahan nga usa ka Cebuana nga si Ana Jarman sa exclusive interview sa Bombo Newsteam.
Matud pa niya nga nagsugod og gymnastics si Jake dihang nibalhin sila sa England aron didto magpuyo permanente sa dihang nadiskubrehan ang iyang kaabtik sa mga monkeybars hinungdan nga gi-scout siya sa usa ka British Gymnastics Coach ug didto nagpadayon ang iyang karera sa natad sa sports.
Matud pa usab ni Ana nga siya mismo adunay kasaysayan sa gymnastics niadtong dalaga pa siya dinhi sa Sugbo nga kauban niya ang kasamtangang coach sa 2-time Olympic gold medalist Carlos Yulo nga si Coach Allen Aldrin Castaneda nga murag “small-world scenario” ang nahitabo.
Kahinumdoman nga si Jake maoy nakadaog sa bronze medal sa men’s floor exercise atol sa iyang duwa sa Paris Olympics sa milabay nga mga semana samtang si Carlos Yulo maoy nakakuha sa gold medal nga gihulagway nga sa samang higayon anaa sila sa podium sa ilang kompetisyon.
