Misaka sa 7.8 porsyento ang inflation rate sa nasud sa buwan sa Oktubre, gikan sa 7.2 porsyento niadtong Setyembre, sumala sa taho gikan sa Philippine Statistics Authority (PSA).
Kini ang ikaduhang sunod-sunod nga bulan nga natala ang mas paspas nga pagsaka sa presyo sa mga palaliton sa nasud.
Tungod niining bag-ong pagsaka, ang average inflation rate gikan sa Enero hangtod Oktubre miabot na sa 5.6 porsyento—mas taas pa sa target range sa gobyerno nga 2 hangtod 4 porsyento.
Matod ni Claire Dennis Mapa, ang pangu sa PSA ug National Statistician, ang sektor sa transportasyon ang nag-unang hinungdan niini nga pagsaka, diin natala ang inflation rate nga 20.1 porsyento ug naglangkob sa 62.9 porsyento sa kinatibuk-ang pagsaka.
Lakip sa mga hinungdan niini mao ang mas taas nga pletehan sa mga jeep ug bus, pagsaka sa presyo sa gasolina ug Liquefied Petroleum Gas (LPG), ingon man ang mas taas nga bayranan sa kuryente.
Hinuon, namatikdan sa ahensya nga mas hinay ang pagsaka sa presyo sa mga pagkaon sa tibuok nasud sulod sa maong panahon.
