CEBU CITY-Midangop si alyas ‘Pedro’ sa Bombo Radyo Cebu arun sa pagpamatuod nga inosente ang nadakpan nga suspek sa pagpatay ni Rhea Mae Tocmo nga hinganlan og ‘Insik’.
Kaluoy ang nabati niini ngadto sa dinakpan gumikan kay iyahang gituohan nga dili kini mahimo ni Insik hinungdan nga nidangop kini sa sibyaanan arun sa ingun mahatag ang saktung hustisya sa biktima ug sa giingung suspek nga si ‘Insik’.
Gidugang pa ni alyas Pedro nga sa iyahang pagkaila kang Insik, giingong nasuheto na kini sa pagkatawo, pamatasan ug lihok sa maong dinakpan, butang nga dili kini makatuo nga kaya niining mopatay ug tawo.
Gitumbok niini, nga mas nagduda kini sa una na nga Person of Interest sa kapulisan nga giilang si ‘Simeon’ gumikan sa samad niini sa nawong ug gidugang nga wala kini nakakita kang Insik nga adunay kuyog nga laing babaye.
Samtang, giangkon usab ni Pedro nga nakasaksi kini sa pagdakop sa mga pulis ni Insik.
Sigon niini, dili adlaw nga Dominggo gidakop ang gituohan nga suspek, inay pasado alas 11 sa gabii sa adlaw nga Sabado.
Nakita sa maong informant nga gipusasan, gitaptapan, gibakli-ad ug gipatung-an si Insik sa gisakyan nga motorsiklo.
Giklaro ni Pedro nga mga pulis ang midala kang Insik gikan sa panimalay niini ug paingon sa police station.
