Gisugdan na sa Philippine National AIDS Council (PNAC) ang pagtuon sa posibilidad sa pagdala sa lenacapavir, usa ka injectable HIV prevention drug nga girekomendar sa World Health Organization (WHO) ug gikonsiderar nga “gamechanger” batok sa HIV.
Matod ni PNAC Executive Director Jojo Feliciano, usa ka technical working group ang kasamtangang nagpahigayon og cost-benefit analysis aron masusi ang kaepektibo ug gasto sa lenacapavir.
Bisan tuod nga maayo ang resulta sa mga pagtuon sa tambal, apan si Feliciano miangkon nga ang presyo kay mamahimong usa ka dakong isyu niini.
Gidugang usab ni Neoman Roxas sa AIDS Healthcare Foundation Philippines nga ang Global Fund Country Coordinating Mechanism nagtrabaho aron makuha ang unang batch sa lenacapavir ug masugdan ang proseso alang sa pagtugot sa FDA.
Ning bag-o lang, opisyal nga girekomendar sa WHO ang lenacapavir isip kapilian alang sa pre-exposure prophylaxis (PrEP). Kini usa ka long-acting injectable nga mahimong ma-inject kada unom ka bulan, ug usa ka alternatibo sa pag-inom og inadlaw.
Taliwala niini, padayong nanawagan si Health Secretary Ted Herbosa kang Presidente Ferdinand Marcos Jr. nga ideklarar ang public health emergency sa HIV, nunot sa 564% nga pagsaka sa bag-ong kaso gikan sa 2010 ngadto sa 2024, ilabina sa mga batan-ong Pilipino.
