PROVINCE OF BOHOL- Nasikop ang usa ka Chinese National nga giingong adunay koneksyon sa United Front sa Chinese Communist Party sa usa ka operation sa mga operatiba sa Bureau of Immigration – Fugitive Search Unit (BI-FSU) sa lungsod sa Panglao sa Bohol kaniadtong Martes, Pebrero 17, 2026.
Giila ang maong Chinese National nga si Jingjin Guo, hamtong ang edad, natawo sa Fujian, China ug dugay nang nagpuyo sa Panglao, Bohol sukad 2018.
Nasayran nga si Guo misulod sa Pilipinas gikan sa China ubos sa Special Resident Retiree’s Visa (SRRV) nga naghatag ug katungod kang Guo nga mopuyo sa atong nasud og multiple entry privileges.
Dugang pa, giingong nagsilbi si Guo isip direktor sa Overseas Chinese Service Center (OCSC) sa Sugbo ug Bohol, nga giingong konektado sa United Front work system sa Chinese Communist Party (CCP), ang ruling party sa mainland China.
Gikataho sab nga ang OCSC mitabang sa dinalian nga pagpasulod sa mga Chinese Nationals nganhi sa Pilipinas ilabi na sa Central Visayas ug lakip sab sa pagsabwag sa propagandang komunistang Intsik.
Gidakop si Guo ubos sa Mission Order 2026-066 tungod sa kasong “Misrepresentation” nga kalapasan sa Philippine Immigration Act of 1940.
Kasamtangang anaa karon sa kustodiya sa Bureau of Immigration si Guo samtang padayon sab ang imbestigasyon may kalabot sa iyang kaso.
