Nanawagan ang Iran sa Estados Unidos nga dawaton ang kapildihan, samtang gihulagway ni US President Donald Trump ang Tehran isip usa ka “daotan” nga nasud ug giawhag ang mga Amerikano nga mangandam sa posibleng padayong pagsaka sa presyo sa lana.
Nagpakita kini nga nagpabiling layo ang posisyon sa duha ka nagkasumpaki nga partido, samtang wala pa mouswag ang mga paningkamot alang sa panaghisgot sa kalinaw ug nagpabiling apektado ang pagbiyahe sa mga oil tanker agi sa estratehikong Strait of Hormuz.
Matud ni Iranian Deputy Foreign Minister Kazem Gharibabadi sa iyang post niadtong Sabado, ang Strait of Hormuz “ablihan ug sirad-an lamang” ubos sa mando sa Iran.
Gidugang niini nga, ipadayon sa Iran ang blockade hangtod nga dawaton sa Estados Unidos ang kapildihan.
Samtang, giawhag ni Trump niadtong Biyernes ang mga Amerikano nga dawaton ang mas taas nga presyo sa gasolina samtang nagpadayon ang panagbangi sa Iran.
Sa iyang political rally sa Garden City, New York, miingon si Trump nga ang pagbayad og “gamay nga dugang” alang sa gasolina takos sa gasto aron masiguro nga dili makabaton og nuclear weapon ang Iran, nga iyang gihulagway isip usa ka “daotan” nga nasud.
