NEW YORK-Dunay panultihon nga ‘Birds of a feather stick together’ apan unsaon kung ang usa sa mga kauban sa langgam dili langgam apan itoy?
Usa ka talagsaon nga panaghigalaay ang naumol taliwa sa usa ka itoy nga chihuahua ug pati.
Ang itoy nga naila nga si Lundy ang dili kalakaw samtang ang pati nga naila’ng si Hermet ang dili usab kalupad.
Nagsugod ang tanan sa dihang gidala si Lundy sa Mia Foundation, usa ka nonprofit organization sa Rochester, New York, nga nag-atiman sa mga mananap nga dunay disabilities. Dinhi nahimamat sa maong itoy si Hermet, kansang nag-istar na sa foundation sukad pa sa nakalabay nga tuig human nga kini dili na kalupad gumikan sa brain injury.
Matud sa Mia Foundation founder nga si Sue Rogers nga nagsugod ang usa ka ‘heartwarming friendship’ sa duha sa dihang gi-uban kini sila samtang gi-atiman.
Nagtoo pa ang mga staff sa maong foundation nga mag-awayay kini, apan sa ilang pagkahingangha, naghagwaay kini.
Ang naasoy nga sweet moments ang dali usab nga nakuhaan og hulagway diin nagviral na kini karon sa internet.
Gumikan usab niini, daghan ang nalingaw sa maong photos ug ubay-ubay ang gusto nga mudonate sa ilang foundation kung diin nakadawat kini og $6,000 sulod lang sa duha ka adlaw, kung diin igo kaayo kini nga makacover usa ka high-end surgery alang sa mga rescue animals.
