Giklaro sa pamilya ni Braille Nichole Q. Kwek nga wala pa’y desisyon nga nahimo kung mopasaka ba og kaso, human sa nagkalapad nga mga taho nga dili na sila mohimo og legal nga aksyon batok sa drayber sa ambulansya nga nalambigit sa makamatay nga aksidente.
Kini ang giklaro sa iyaan ni Kwek human mikatap ang mga pasangil nga ang pamilya giingong miuyon nga dili mopasaka og kaso baylo sa tunga sa milyon ka pesos nga husay.
Sumala sa pamilya, wala sila mouyon sa impormasyon nga gipakatap, ug gipasiugda nila nga ang kinabuhi ni Kwek dili mabayran og bili ug nga dili nila mahatagag bili ang pagkawala sa ilang minahal nga paryente.
Sa pagkakaron, ang pamilya naghulat sa desisyon sa amahan ni Kwek, kinsa nagtrabaho sa Dubai ug gilauman nga moabot sa ulahi ning semanaha.
Kahinomdoman nga ni-counterflow ang usa ka ambulansya nga niresulta sa duguong aksidente, hinungdan nga natuldokan ang kinabuhi ni Kwek niadtong
Abril 14, 2026, sa Archbishop Reyes Avenue flyover sa Cebu City.
Diin ang mga imbestigasyon nagpakita nga ang ambulansya nga nalambigit sa usa ka makamatay nga aksidente sa dalan sa Dakbayan sa Sugbo mao ang mi-counterflow sa wala pa kini makabangga sa usa ka motorsiklo nga gisakyan sa duha ka estudyante sa naasoyng dapit.
Hinungdan nga nakabsan sa kinabuhi diha-diha dayon ang 17-anyos nga si Kwek, samtang napeligro ang kondisyon sa drayber sa motor nga si Juan Antonio Ladioray, 18-anyos, kinsa parehong mga estudyante sa usa ka pribadong tunghaan sa dakbayan, usa usab ka estudyante nga nagkuha og Mechanical Engineering sa samang institusyon.
