Nagkasabot ang Oklahoma City Thunder ug All-Star forward nga si Jalen Williams sa lima ka tuig nga kontrata nga mobalor og $287 million.
Ang extension kabahin sa serye sa mga kontrata nga gipirmahan sa mga importanteng player alang sa mga nidaog sa NBA karong tuiga.
Niadtong Martes, si Shai Gilgeous-Alexander nipirma og upat ka tuig nga extension nga nagkantidad og $285 million, samtang si Chet Holmgren mipirma usab og lima ka tuig nga deal nga nagkantidad og $250 million.
Sa edad nga 24, si Williams usa sa mga batan-ong core players sa Thunder nga naningkamot nga magpabiling buhi ang ilang championship dynasty.
Kahinumduman nga ang team nakadaog og 68 ka duwa sa regular season ug gikoronahan nga NBA champions human gipildi ang Indiana Pacers sulod sa pito ka duwa sa Finals — ang ilang unang titulo sukad mibalhin sa Oklahoma City niadtong 2008.
Ug sa tibuok 2024–25 season, si Williams nag-average og 21.6 puntos, 5.3 rebounds, ug 5.1 assists.
