Gisentensiyahan na usab sa Sandiganbayan Special Third Division si Janet Lim Napoles og reclusion Perpetua o hangtod sa 80 ka tuig nga pagkabilanggo.
Kini tungod sa kaso sa duha ka ihap sa malversation sa mga pundo sa publiko nga may kalabotan sa dili patas nga paggamit sa Priority Development Assistance Fund (PDAF).
Sa 165 ka pahina nga desisyon sa Sandiganbayan, si Napoles ug uban pa nakitang sad-an sa malversation sa mga pundo sa publiko sa namatay nga si Benguet Rep. Samuel Dangwa nga mokabat sa P19-milyon.
Ang balaod nag-ingon nga ang usa ka tawo nga nalambigit sa malversation sa mga pundo sa publiko mahimong masilotan og reclusion perpetua kung ang kantidad nga gikawat molapas sa P8.8-M.
Samtang, ang mga kaso batok kang Dangwa ug tulo pa gibasura human sa ilang kamatayon sumala sa desisyon nga gisulat ni Associate Justice Ronald Moreno, kinsa nangulo sa Special Third Division sa Sandiganbayan.
