Nagtimaan ang nasud nga Japan sa ika-80 nga anibersaryo sa pagpamomba og atomic bomb sa Nagasaki kaniadtong Sabado, Agosto 9, diin sa susamang higayon kay mipamahayag si Japanese Prime Minister Shigeru Ishiba sa tinguha nga kalibutan nga walay nuclear weapons.
Matod pa niini nga isip naghiniusang nasud nga nakasinati sa pagpamombang nuclear kay tahas nila ang pagpatigbabaw sa Three Non-Nuclear Principles ug pagpanguna sa kalibutanong tinguha sa kalibutang walay armas nuclear.
Gibuhat niini ang maong memorial ceremony sa Nagasaki Peace Memorial Park diin pag untop alas 11:02 sa buntag sa maong adlaw gitimaan ang magtagak sa nuclear bomb.
Gani sa pikas bahin kay mipasidaan sab si Nagasaki Mayor Shito Suzuki sa nagpadayong kagubot sa nagkadaiyang dapit sa kalibutan nga maoy makapa-aghat og nuclear war.
Ang dagkong mga bahin sa Nagasaki niadtong Agosto 9, 1945 kay nahimong wasteland, sa dihang ang Estados Unidos nagtagak og 10,000-pound nga plutonium-239 nga bomba, nga gianggaan og “Fat Man,” diha sa siyudad nga mipatay dayon sa gibana-bana nga 27,000 sa gibanabanang populasyon nga 200,000 ka tawo sa Nagasaki.
Ang mga representante gikan sa 95 ka mga nasud ug mga teritoryo lakip ang nuclear superpower nga Estados Unidos, ug Israel kay mitambong sa tinuig nga seremonya.
Mitambong usab ang Russia, nga adunay pinakadako nga nuclear stockpile sa kalibutan.
