Nakasinati og ‘unprecedented rainfall ang eastern Japan, hinungdan sa kaylap nga pagbaha ug pagdahili sa yuta nga nakapatay sa unom ka indibidwal ug nakaangol sa laing lima pa.
Ang mga awtoridad nag-ingon nga usa ka babaye ang lakip sa mga namatay human ang iyang sakyanan naanod sa baha sa usa ka dalan, samtang laing ang duha pa nag-collapse sa dalan ug sa ulahi namatay.
Adunay kapin sa 100,000 ka mga residente ang gitambagan nga mobakwit human sa pagdahili sa yuta ug pagkawala sa kuryente nga gipahinabo sa kusog nga ulan.
Samtang kapin sa 20,000 ka mga panimalay ang nawad-an og kuryente, ug 7,000 ka mga biyahero ang gitaho nga na-stranded sa tibuok gabii sa Narita Airport sa kaulohan nga Tokyo.
Nakatala usab ang Chiba, duol sa Tokyo, og kapin sa 100mm nga ulan kada oras sukad niadtong Huwebes sa hapon. Kini tulo ka pilo sa average nga ulan karong Agosto ug ang pinakataas nga natala sa nasud.
Ang lokal nga mga awtoridad nagpagawas og level five emergency warning, ug mao kini ang pinakataas nga alert level, niadtong Huwebes, apan gipaubos kini ngadto sa level four niadtong Biyernes sa buntag. Bisan pa niini, ang mga pasidaan sa pagdahili sa yuta ug pagbaha nagpadayon gihapon.
