Nagpakita ang mga dokumento nga gipagawas sa United States Department of Justice (DOJ) nga ang namatay nga sex offender nga si Jeffrey Epstein giingong nagsuhol og usa ka team nga nakabase sa Pilipinas aron papason ug tabunan ang negatibo nga impormasyon bahin kaniya sa internet.
Kini gibase sa mga dokumento nga nakolekta sa Estados Unidos, lakip ang mga pagbayloay og email tali ni Epstein ug Al Seckel, kinsa bana sa igsoon ni Ghislaine Maxwell—kanhi uyab ni Epstein ug pangunang kakunsabo sa pag-recruit sa mga menor de edad.
Si Maxwell nakonbikto niadtong 2021 kalabot sa mga krimen sa sex trafficking ni Epstein.
Sa mga email, gihulagway ni Seckel ang usa ka organisadong kampanya aron itago ang giingong mga krimen ni Epstein gikan sa mga online search results. Apil niini ang paghimo og positibo nga mga link bahin kang Epstein.
Sa usa pa ka email, niadtong Disyembre7, 2010, gibutyag ni Seckel kang Epstein nga napapas na sa mga Google search suggestions ang mga termino nga maylabot sa akusado nga matud pa gitrabaho sa mga eksperto nga nakabase sa Pilipinas.
Sumala sa mga dokumento sa U.S. DOJ, ang grupo naghimo og daghang mga website ug mga web page nga naghulagway kang Epstein isip usa ka philanthropist, nagpondo sa mga proyekto nga may kalabotan sa syensya, ug bisan sa mga sports.
Nasayran nga kini nga mga pages konektado sa liboan ka mga link aron mamanipula ang mga resulta sa search engine.
Sigon usab ni Seckel nga importante nga i-edit ang biography ni Epstein sa pages sa Wikipedia. Sa usa ka email nga gipetsahan Disyembre 16, 2010, gitawag niya ang pagkontrol sa sulud niini nga usa ka “important victory” tungod kay kanunay kini makita sa mga search results sa internet.
Kahinumdoman nga si Jeffrey Epstein gidakop kaniadtong 2019 tungod sa mga kaso sa sex trafficking ug pag-abuso sa mga menor de edad sa US ug uban pang mga nasud. Namatay siya samtang nabilanggo sa usa ka prisohan sa New York sa susamang nga tuig samtang naghulat sa pagdungog.
