CEBU CITY — Giimbestigaran sa kapulisan ang nahitabong pagpanulis kagabii sulod sa usa ka mall sa Barangay Bakilid sa dakbayan sa Mandaue.
Kini human nga gitulis sa gituohang mga sakop sa “martilyo gang” ang duha ka jewellry store, usa ka pawnshop, ug usa ka money changer sulod sa J Center Mall.
Matud sa hepe sa Mandaue City Police Station 2 nga si Police Captain Marvin Fegarido nga misulod sa mall ang wala mailhing tulisan dala ang ilang mga high-powered nga armas.
Human nila gidis-armahan sa mga naka-bonnet nga tulisan ang mga gwardya, giransak nila dayon ang nahisgutang mga establisimento.
Dugang pa ni Fegarido nga misibat dayon ang wala mailhing mga tulisan dala ang ilang nakuha nga alahas ug kwarta sakay sa ilang motor.
Samtang naangol sa maong insidente ang usa ka guard human nga giingong nadukdukan sa mga tulisan.
Gisubay sa mga imbestigador ang CCTV footage duol sa nahitaboan samtang ilang giimbestigaran ang mga gwardya sa mall mahitungod sa maong insidente.
Gipangita karon sa kapulisan ang mga responsable sa pagpanulis sa nahisgutang mga establisimento sulod sa dako nga mall.
