Bukas ang Pilipinas sa pakigtambayayong sa nagkalain-laing mga nasud alang sa eksplorasyon sa lana ug gas ug dili lang naka-focus sa usa ka nasud sama sa China.
Sumala ni Energy Secretary Sharon Garin, si Presidente Ferdinand “Bongbong” Marcos Jr. kay bag-o lang mipirma og walo ka bag-ong service contracts alang sa eksplorasyon sa lana, natural gas, ug hydrogen human sa pagpalapad sa mga operasyon sa Malampaya.
Gipasabot sa kalihim nga bisan adunay mga pribadong kompanya nga adunay mga langyaw nga kauban gikan sa Australia, United Kingdom, Israel, ug Estados Unidos, kay walay konkreto nga kontrata alang sa hiniusa nga eksplorasyon tali sa gobyerno sa Pilipinas ug China.
Gipasiugda ni Garin nga base sa iyang katapusang interaksyon sa Embahada sa China, ang mga panagsulti naka-tutok lamang sa pagsiguro sa padayon nga pag-abot sa mga order sa diesel ug gasolina gikan sa mga lokal nga kompanya ug dili sa eksplorasyon.
Dugang ni Garin nga bisan kung ang mga Pilipino adunay abilidad sa pagpanguna sa mga kalihokan sa pag-drill sama sa mga anaa sa Malampaya, adunay gihapon panginahanglan alang sa kolaborasyon sa mga langyaw nga eksperto alang sa mga modernong teknolohiya.
Usa ka pananglitan niini mao ang eksplorasyon sa natural hydrogen sa Zambales, Palawan, ug Nueva Ecija diin ang usa ka kompanya gikan sa Estados Unidos mao ang kauban sa nasud tungod sa ilang kahanas.
Gipasalig usab sa opisyal nga ang bisan unsang sugyot alang sa hiniusang mga proyekto sa eksplorasyon sa umaabot klaro ug moagi sa hustong proseso.
