Gipili ni Presidente Ferdinand Marcos Jr. si Supreme Court Associate Justice Rodil V. Zalameda isip bag-ong Chief Justice sa Korte Suprema nga mopuli kang Chief Justice Alexander Gesmundo nga moretiro karong adlawa, Nobyembre 6.
Matod ni Presidential Communications Office Secretary Lino Cayetano nga kapin sa tulo ka dekada ang kasinatian ni Zalameda sa serbisyo publiko ug sa sistema sa hustisya, lakip na ang iyang pagserbisyo isip opisyal sa korte, public prosecutor, ug mahistrado sa Court of Appeals ug Supreme Court.
Gipasalig usab sa Palasyo nga gisaligan ni Presidente Marcos ang abilidad ni Zalameda sa pagdumala sa hudikatura nga adunay integridad, walay pagpihig ug lig-on nga pagsunod sa balaod.
Samtang, mibiya na si outgoing Chief Justice Alexander Gesmundo sa mga kaubang mahistrado, opisyal ug kawani sa Korte Suprema atol sa iyang katapusang flag ceremony isip punong mahistrado.
Sa iyang mensahe, gipasalamatan ni Gesmundo ang mga kauban sa ilang dedikasyon ug sakripisyo sa pagserbisyo sa Hudikatura ug sa katawhang Pilipino.
Gihunumdon niya ang mga pagsulay nga giatubang sa institusyon, lakip na ang COVID-19 pandemic, apan bisan pa niini, nagpadayon ang Korte Suprema sa pagtuman sa ilang katungdanan.
Gibutyag usab ni Gesmundo ang mga reporma ug bag-ong programa nga iyang gipasiugdahan aron mapalambo ug mamodernisar ang sistema sa mga korte sa nasud.
Gihatagan siya og certificate of appreciation isip pag-ila sa iyang 41 ka tuig nga serbisyo sa gobyerno, lakip ang pagpasalamat sa mga kawani sa iyang suporta ug pagsalig sa ilang mga abilidad.
Nakatakdang moabot sa mandatory retirement si Gesmundo ugma, Nobyembre 6, sa edad nga 70 anyos.
