Dili i-ban sa kagamhanan sa Dakbayan sa Sugbo, ang paggamit og “tabanog” sa siyudad, kini taliwala sa mga kadaot nga namugna niini sa mga linya sa kuryente nga miresulta sa sunod-sunod nga pagkawagtang sa suplay sa kuryente ug pagkadisgrasya sa pipila ka mga motorista sa Cebu Cordova Link Expressway.
Matud ni Cebu City Mayor Nestor Archival, nga ang labing pinakadako nga naapektuhan sa pagkawagtang sa suplay sa kuryente, mao ang Barangay Mambaling, diin moabut sa 20 ka mga higayon nga nagka-“power disturbance” gumikan sa mga nasangit nga “tabanog.”
Sigon sa Mayor, nga nakadawat siya og report gikan sa Visayan Electric Company Inc., nga pipila sa mga lugar sa dakbayan ang nakasinati og pagkawagtang sa suplay kuryente nga naglakip Barangay Pasil, Barangay Busay og Barangay Mambaling.
Gibutyag ni Archival, nga ang buhatan sa Department of Manpower Development and Placement (DMDP) og ang VECO, magpahigayon og pormal nga proyekto aron pagtudlo sa tukma nga paagi sa pagpalupad og “tabanog” nga dili makadisturbo sa komunidad.
Mimando usab ang opisyal sa mga sakop sa Disaster Team sa matag barangay ug sa dakbayan nga pangtangtangon ang mga sagabal nga kable sa tabanog sa kadalanan aron malikayan ang aksidente sa mga motorista.
Mipahimangno usab si Archival, sa mga maggamitan og tabanog nga adto magpalupad sa mga hawan nga dapit.
