Gikabutyag ni Cebu Governor Pamela Baricuatro nga ang Kagamhanan sa Lalawigan sa Sugbo, hugot nga nakig-alayon sa Provincial Disaster Risk Reduction and Management Office (PDRRMO) aron masiguro nga adunay mga lakang sa kaluwasan ug medikal nga pagtubag kung ugaling moigo ang “The Big One” sa Sugbo.
Gidungang ni Baricautro nga ang probinsya, naka identify na og mga posibleng evacuation site, taliwala sa padayon nga pagmonitor sa Department of Science and Technology – Philippine Institute of Volcanology and Seismology sa Central Visayas sa posibleng aktibong Central Cebu Fault System (CCFS).
Ang pamahayag ni Baricuatro mitumaw human sa giluwat usab nga impormasyon sa PHIVOLCS Visayas, diin nagpasidaan bahin sa usa ka “potentially active fault” sa Sugbo nga mahimong makamugna og magnitude 7.2 ngadto sa 7.5 nga linog kon kini mahitabo.
Diin, gitubag ni Engineer Robinson Jorgioang Director sa PHIVOLCS Visayas, nga ang mga kabalaka kung ang bag-o lang ba nga linog sa Mindanao ug ang nagpadayon nga mga aftershock niini makaapekto ba sa rehiyon sa Visayas tungod sa kaduol niini.
Gipasabot ni Jorgio nga ang linog sa southern Philippines naggikan sa Cotabato Trench, nga nahimutang layo sa mga fault system sa Visayas, labi na kadtong naa sa Cebu.
Tungod niini, giingon niya nga dili kini lagmit makaapekto sa mga fault system ug trenches sa rehiyon.
