Gikinahanglan nga madeterminar una sa kagamhanan sa nasud sa Pilipinas kung state sanctioned ba sa kagamhanan sa China o independente nga gibuhat kini sa China Daily ang mikatap nga video online, maylabut sa isyu nga AI generated video nga nagpakita ug naghulagway sa Pilipinas isip usa ka “unggoy” nga sunod sunoran sa mga langyaw nga nasud.
Mao kini ang gibutyag ni Doctor Ryan Maboloc, usa ka Professor sa Political Science, nga matud pa kinahanglan una sutaon sa gobyerno sa Pilipinas kung unsa ka lehitimo ang mismong mikatap nga video, una mobuhat ug lakang ang Pilipinas sa pagpenalize ug paghimo ug diplomatic protest sa nagpagawas sa propaganda.
Sigon niini nga usa sa mga nag-unang hinungdan mao ang kolonyalismo, o ang idelohiya kaniadto sa mga langyaw sa pagpanakop sa Pilipinas sa dugay nang panahon, hinungdan nga kinahanglan nga ipadayag sa mga Pilipino ang baruganan hilabi na sa katungod sa katawhan ug sa gipanag-iya sa Pilipinas.
Gihimug-atan ni Maboloc nga kung kini dilli State-sanctioned, angayan lang nga mahibalo ang Chinese government aron sa paghimo ug lakang sa pagpanubag sa maong Media Network.
Kahinumdoman nga nagpagawas na og pormal nga Diplomatic Protest ang Department of Foreign Affairs kagahapon Biyernes, Hulyo 17, 2026 kalabut sa isyu.
