CEBU – Posibleng maghuwat pa og pipila ka semana o buwan ang mga biktima sa Bagyong Odette una nila makuha ang ilahang hinabang pinansyal.
Kini human kasamtanganag gipahunong sa Comission on Elections (Comelec) ang pagpang-apod apod sa hinabang karong panahon sa pagpangampanya.
Apan, ni-apelar o nihangyo og exemption ang Cebu City government sa Comelec aron mahatagan og pagtugot nga maapod-apod ang hinabang pinansyal alang sa mga biktima sa Bagyong Odette.
Gitahasan ni Cebu City Mayor Mike Rama si Atty. Gerry Carillo, ang chairperson sa City Disaster Council, nga personal nga mosumiter og petition for exception.
Kini gumikan dugay nang gahuwat ang mga biktima sa maong ayuda samotan pa kung mag-paabot pa kini kung kanus-a mahuman ang eleksyon.
Hinuon, nihatag naman ang Comelec Central Visayas og verbal go signal sa siyudad sa pagkonsiderar sa maong butang.
Apan matud ni Carillo nga gusto sa mayor nga moagi sa saktong proseso sa pagpangayo og exemption aron dili makwestyon sa Commission on Audit (COA).
