TALISAY CITY,CEBU- Gironda sa mga nasudnon ug local nga opisyal sa dakbayan sa Talisay sa habagatang Sugbo ang padayong konstruksyon sa Mananga river nga nahiagom og kadaot human sa pag-igo sa Bagyong Tino niadtong Nobyembre 2025.
Diin, mibisita pagbalik sa dakbayan sa Talisay si Department of Public Works and Highways (DPWH) Secretary Vince Dizon aron sa personal nga pagsuta sa kalambuan sa infrastructure project sa suba sa Mananga.
Gibisita ni Dizon ang maong dapit kagahapong adlawa sa Miyerkules, Marso 25 kauban sila si Talisay City Mayor Gerald Anthony “Samsam” Gullas ug si Cebu Provincial Governor Pamela Baricuatro aron ma-inspeksyon ang dagan sa konstruksyon sa isig ka kiliran sa maong suba.
Sa pamahayag ni Mayor Gullas, gilaraw niini nga ang DPWH ug Talisay City LGU sa pagpatukod og rehabilitative project sa Mananga nga napundohan na nila nga mamahimong park o bike lane.
