Giawhag ni Senadora Imee Marcos ang mga ahensya sa SSS, GSIS, PAG-IBIG, ug PhilHealth nga ipatuman una ang temporaryong “tigil-singil” o loan moratorium taliwala sa nagkagrabe nga krisis sa enerhiya.
Gihimo sa senadora ang maong panawagan human gideklara ang national state of energy emergency nga nagresulta sa walay puas nga pagsaka sa presyo sa lana ug uban pang nag-unang palitonon.
Sumala ni Marcos, dako kini nga tabang alang sa mga mamumuo, mag-uuma, ug mangingisda aron madugangan ang ilang madala nga kita sa balay para sa pagkaon ug uban pang panginahanglan.
Gipasabot sa senadora nga mas maayo nga ihatag una og kompleto ang suholan sa mga empleyado imbes nga kaltasan kini karon nga panahon sa kalisod.
Gipahinumdoman usab niya nga nahimo na kini kaniadto sa panahon sa pandemya ug mga dagkong kalamidad diin nakatabang ang maong “grace period” aron makabangon ang mga apektadong sektor.
Sa pagkakaron, gipaabot nga tun-an sa maong mga ahensya ang hangyo sa senadora aron mahatagan og gamay nga ginhawa ang katawhang Pilipino nga naigo sa krisis.
