Nagpatuman ang House of Representatives og mga lakang sa pagpakunhod sa gasto ug gibag-o ang mga kahikayan sa trabaho aron mahimong mas episyente ang operasyon ug paggamit sa pondo sa publiko.
Base sa usa ka memorandum nga gi-isyu niadtong Marso 12, ang tanang opisina gikinahanglan nga mosunod sa mga polisiya subay sa Malacañang Fiscal Discipline Policy. Kini naglakip sa hybrid work setup, mga pagdili sa pagbiyahe ug miting, mas maalamon nga paggamit sa kuryente ug kagamitan, ug pagpalapad sa mga digital nga proseso.
Ubos sa bag-ong setup, atol sa mga recess period, on-site sa Martes ug Miyerkules; work from home sa Lunes ug Huwebes.
Atol sa mga sesyon, on-site gikan sa Lunes hangtod Miyerkules; WFH sa Huwebes.
Gisiguro sa House of Representatives nga ang mga serbisyo sa mga magbabalaod, empleyado, ug publiko kay dili maapektuhan.
Ang contact details sa opisina kinahanglan nga i-post sa website, Facebook, ug Viber Group alang sa padayon nga komunikasyon.
Ang ubang mga unit sama sa Engineering, Medical, Records, ug Security kinahanglan nga magpabilin sa site aron masiguro ang padayon nga operasyon.
Ang mga empleyado nga mobalik sa opisina sa mga adlaw sa WFH magkinahanglan og pag-apruba gikan sa Secretary General.
Apil usab sa mga lakang ang mas estrikto nga paggamit sa kuryente, air-conditioning, ug kagamitan, ingon man ang transportasyon ug pagdaginot sa gasolina.
Apil niini ang limitado nga oras sa air-conditioning, standardized nga mga thermostat sa 24°C, awtomatikong pagsira sa mga monitor sa kompyuter, ug pagkunhod sa pag-imprinta.
Nagplano ang Kamara nga mogamit og mga solar panel, LED lighting, inverter-type AC units, ug ang pagtukod og mga “Green Teams” aron mabantayan ang kahusayan sa enerhiya.
Regular usab nga susihon sa Executive Committee ang kaepektibo sa mga lakang ug magproponer og dugang nga mga estratehiya alang sa mas episyente nga mga operasyon.
