Gipakusog sa Anti-Red Tape Authority (ARTA) ang kampanya niini batok sa mga non-compliant local government units (LGUs) human kini nagpasaka og kaso sa Office of the Ombudsman batok sa 117 ka local government units (LGUs) tungod sa giingong wala pagpatuman sa electronic Business One-Stop Shop o eBOSS.
Sumala ni ARTA Secretary Ernesto Perez, dugang nga mga kaso ang gilauman sa sunod bulan batok sa ubang non-compliant LGUs human sa ilang inspeksyon.
Midumili ang kalihim sa pag-ingon kung aduna bay mga LGU sa National Capital Region nga nalakip sa mga gikasohan.
Gawas sa eBOSS, giimbestigahan usab sa ahensya ang 11 ka LGUs nga giingong nakalapas sa Executive Order No. 41 tungod sa padayon nga pagkolekta sa pass-through fees sa mga national roads.
Kahinumduman nga ang ARTA nagpasaka usab og reklamo sa grave misconduct batok sa mayor sa Meycauayan City sa Bulacan kalabot niini nga isyu ug nangayo sa iyang preventive suspension.
Samtang, giila usab sa ARTA ang mga LGUs nga nagsunod sa balaod ug gipasalig ang padayon nga pagbansay sa gobyerno sa paggamit sa mga digital tools.
