Niduso ang kampo ni kanhi Negros Oriental Congressman Arnolfo Teves Jr. og writ of habeas corpus petition nunot sa iyang pagkasikop pag-usab sa Timor-Leste.
Sa online briefing, ang legal counsel ni Teves sa Pilipinas, nga si Atty. Ferdinand Topacio, nipahibalo nga kon tumanon ang ilang petisyon, pasakaan si Teves sa korte ug kinahanglang kumbinsihon sa mga awtoridad sa pagdakop ang korte nganong gidakop siya ug kon ma-deport, kinahanglang ipasabot usab nila ang basehan sa pagpalagpot ni Teves.
Gihatagan og gibug-aton ni Atty. Topacio nga ang hangyo sa extradition sa gobyerno sa Pilipinas gisalikway kaniadtong Marso.
Gibutang usab niya ang tulo ka sukaranan alang sa pagdumili o pagsalikway sa posible nga pagpahawa ni Teves.
Diin una, ang kinabuhi sa kanhi magbabalaod anaa sa grabeng kakuyaw, ikaduha, mahimo siyang mapugos sa pag-antus sa torture ug uban pang dili makatawhanong silot, ug ikatulo, mahimo siyang ipailalom sa mga proseso nga mahimong hinungdan sa iyang inhustisya.
Hinuon, bisan og ma-repatriate si Teves sa Pilipinas, si Atty. Topacio nga andam ang ilang kampo nga modepensa sa kanhi magbabalaod isip iyang mga abogado sa depensa kutob sa ilang mahimo.
Masaligon usab sila nga huyang kaayo ang kaso sa gobyerno batok sa ilang kliyente nunot sa pagbakwi sa mga testimonya sa tanang testigo.
Si Teves maoy gitumbok nga utok sa pagpatay kang kanhi Negros Oriental Gov. Roel Degamo ug 9 pa sa Pamplona massacre niadtong Marso 4, 2023.
Diin si Arnie Teves gipasakaan usab og kaso sa pagpatay sa 3 ka indibidwal sa Negros Oriental niadtong 2019.
Gitudlo usab si Teves isip terorista sa Anti-Terrorism Council tungod sa sunodsunod nga pagpamatay ug pagpanghasi sa Negros Oriental.
