Mipadayag sa iyang pagbati ang usa ka makeup artist ug pageant handler sa Dakbayan sa Sugbo kabahin sa resulta sa bag-o lamang natapos nga Miss Universe Philippines 2026, nga nahimong sentro sa nagkadaiyang opinyon sa social media ug sa tibuok nasud, ilabi na sa Cebu.
Sa pakighinabi sa Bombo News Team, si Anne Balagas Tabor, usa ka makeup artist ug pageant handler, miingon nga sukad pa lamang sa pagsugod sa kompetisyon, kapansin-pansin na ang kusog nga performance sa mga kandidata gikan sa Cebu City, Cebu Province, ug La Union.
Matud niini, ang maong tulo ka kandidata maoy iyang personal nga top picks tungod sa ilang maayong pasundayag sa nagkadaiyang bahin sa kompetisyon. Apan sa tumoy nga bahin sa pasundayag, giila niya nga makatarunganon lamang ang pagkadaug sa kandidata sa La Union isip Miss Universe Philippines 2026.
Gipasabot ni Tabor nga ang kandidata sa La Union nagpabiling consistent gikan sa preliminary rounds hangtod sa coronation night, hinungdan nga nakita niini nga takos gyud kini sa korona.
Dugang pa niini, nakahatag og dakong impresyon ang kandidata sa La Union tungod sa iyang “Latina beauty,” nga maoy usa sa mga nakadani sa atensyon sa mga manan-aw ug hurado.
Bisan pa sa nagkalainlaing reaksyon online, giingon ni Tabor nga ang desisyon sa mga hurado angayng tahuron, tungod kay sila ang adunay basehan ug sukdanan sa pagpili sa mananaog.
Nanawagan usab kini sa mga Sugbuanon ug sa publiko nga ipadayon ang suporta sa bag-ong Miss Universe Philippines, sanglit kini na ang mopas-an sa ngalan sa Pilipinas sa internasyonal nga entablado.
Samtang, sa pagtimbang niini sa performance sa kandidata sa La Union, giingon niyang ni-excel kini sa Swimsuit Competition, Evening Gown, ug sa Question-and-Answer portion—mga aspeto nga dako og papel sa iyang kadaugan.
