Mihangyo ang legal team ni kanhi Presidente Rodrigo Duterte sa International Criminal Court (ICC) nga amyendahan ang electronic court protocol niini tungod sa ilang kabalaka sa padayong pagdagsa sa mga ebidensya nga gisumite alang sa kaso.
Sa ilang filing niadtong Septiyembre 3, 2026, gipahayag sa defense team nga ang kadaghan sa mga materyales nga gisumite sa wala pa ang pormal nga hearing mahimong makaapekto sa kalidad ug pagdumala sa mga ebidensya nga pagasusi-on sa korte.
Matud sa kampo ni Duterte, gikan sa kapin 5,000 ka items sa wala pa ang confirmation stage, misaka na kini ngadto sa kapin 25,000 ka mga materyales, ug gilauman pa ang dugang nga mga dokumento ug datos.
Gipahayag usab sa defense team ang kabalaka bahin sa mga materyales nga mahimong mahimong kabahin sa mga pagdungog ubos sa kaso batok kang Duterte, nga may kalabotan sa mga alegasyon sa pagpatay nga nalambigit sa iyang kampanya batok sa ilegal nga droga.
Dugang pa sa depensa, ang kadaghan sa mga ebidensya naglakip sa open-source ug user-generated materials nga, sumala kanila, mahimong lisod i-verify tungod sa mga pangutana bahin sa pagkatinuod, gigikanan, ug kasaligan niini.
Tungod niini, giawhag sa defense team ang ICC nga susihon ug palig-onon ang mga pamaagi sa pagdumala ug pagsala sa mga elektronikong ebidensya aron masiguro nga ang mga materyales nga pagabasehan sa proceedings tukma, mapamatud-an, ug may kalabotan sa kaso.
