Gitun-an sa kampo ni kanhi Senador Leila De Lima ang legal nga aksyon aron patubagon ang mga nagpaluyo sa iyang pagkapriso kalabot sa kaso sa ilegal nga drugas.
Kini nunot usab sa pagkaabsuwelto sa kanhi Senador sa kataposang kaso sa drugas nga gisang-at sa prosekusyon sa miaging administrasyon ubos ni kanhi Presidente Rodrigo Duterte.
Gitan-aw sa abogado sa kanhi senador ang responsibilidad ni kanhi Pang. Duterte, kanhi Justice Secretary Vitaliano Aguirre, ug ubang mga tawo nga nagpaluyo sa iyang pito ka tuig nga pagkapriso.
Gibutyag usab ni De Lima nga dako ang iyang gibati nga kahayahay ug makaginhawa na siya og maayo human gibasura sa Muntinlupa RTC ang ikatulo ug kataposan niyang kaso sa drugas.
Kahinumdoman nga ang kanhi senador nakagawas niadtong Nobyembre 2023 human gitugotang makapiyansa human natanggong sa Camp Crame sukad niadtong Pebrero 2017.
Unang naabsuwelto si De Lima niadtong Pebrero 2021 dihang gibasura sa Muntinlupa City RTC-Branch 205 ang usa sa iyang tulo ka kaso.
Niadtong Mayo 2023, giabsuwelto usab sa Muntinlupa RTC Branch 204 si De Lima ug Ronnie Dayan, ang iyang kaubang akusado ug kanhi bodyguard, sa kasong illegal drug trading.
Sa laing bahin, si De Lima mipadayag usab nga wala pa siyay plano nga modagan alang sa 2025 midterm elections apan matud niya magpadayon ang pakigbatok sa inhustisya ug pagpanglupig.
Sa pagkakaron, gawas nga tigpamaba sa Liberal Party, nagtudlo ug nagplano si De Lima nga mobalik sa legal practice.
