CEBU CITY — (Update) Nagpabiling tak-om ang baba ang kampo sa lawyer-broadcaster nga si Atty. Juril Patiño subay sa iyang pagkasikop sa Pier 4 sa dakbayan sa Sugbo.
Kini human nga miisyu ang Regional Trial Court (RTC) Branch 20 og warrant of arrest sa kasong rape batok sa abugado.
Matud sa Senior Agent sa National Bureau of Investigation (NBI) – VII nga si Atty. Donna Ver Inisan, dugay-dugay nang nagtago si Patiño ug nag-ilis kini pirmi og sakyanan.
Dugang pa ni Inisan nga gikatakda nang ibahin ang manlalaban sa Cebu City Jail human kini gikustodiya sa NBI kung mabalik na sa RTC ang warrant niini.
Kung mahinumduman, mipasaka og reklamong rape ang usa ka 13-anyos nga dalagita batok ni Patiño human kini gituohang gilugos sulod sa sakyanan.
Apan hugot kining gihimakak sa maong manlalaban ug magsisibya.
Nasayran nga misaka na sa trial court ang maong kaso batok kaniya niining tuiga lang base sa ilang nahipos nga mga ebidensya.
Nahimong station manager kaniadto si Atty. Patiño sa Bombo Radyo Cebu ug anchorman sa Brigada News FM Cebu.
