Nagingun ang kanhi bagman ni Bise Presidente Sara Duterte, si Ramil Madriaga, nga andam siya nga motestigo sa bisan unsang impeachment proceedings kon ipatawag sa Senado, Kongreso, o sa Office of the Ombudsman.
Sa usa ka news forum, ang abogado ni Madriaga, si Atty. Raymund Palad, miingon nga ang iyang kliyente andam nga motuman kon makadawat siya og subpoena.
“The fact na nag-issue siya ng affidavit, puwede siya ipatawag sa Kongreso, Senado at Ombudsman. Yung willingness niya, yes, kung maka-receive siya ng subpoena, mag-appear siya,” matod ni Palad.
Giangkon usab ni Palad nga nakurat siya sa pagkahibalo nga ang affidavit ni Madriaga gilakip sa mga reklamo sa impeachment batok sa bise presidente. Sumala niya, nahibal-an ra niya ang bahin sa paggamit sa affidavit sa nahisgutang kaso pinaagi sa mga balita.
“Yung pagsama ng affidavit sa impeachment, hindi ko alam ‘yon. Kung isinama pala ‘yon, at least nandoon na siya,” dugang ni Palad.
Sa iyang affidavit, giakusahan ni Madriaga si Bise Presidente Duterte nga kunohay migamit og kwarta gikan sa mga POGO ug mga tigbaligya og droga aron pondohan ang iyang kampanya sa eleksyon sa 2022.
Gibutyag usab ni Palad nga adunay mga opisyal nga mihangyo nga interbyuhon si Madriaga bahin sa iyang affidavit.
Sumala niya, ang lider sa Liberal Party-List nga si Leila de Lima kunohay nangutana kon mahimo ba niyang interbyuhon ang iyang kliyente nga dili direktang ilambigit siya sa mga proseso sa impeachment.
Gikumpirma usab ni Palad nga si kanhi Senador Antonio Trillanes IV kaniadto mihangyo nga mobisita kang Madriaga aron hisgutan ang sulod sa iyang affidavit.
Samtang, ang abogado miingon nga mopasaka sila og aplikasyon aron ibutang si Madriaga ubos sa Witness Protection Program tungod sa giingong mga hulga nga iyang nadawat sa iyang kinabuhi.
