CEBU – Nahukman sa Sandiganbayan Sixth Division nga sad-an kalabot sa Malversation of Public Funds sila si kanhi Kongresista sa ika upat nga Distrito sa Sugbo Clavel Asas Martinez, anak niini nga si kanhi Bogo Mayor ug Cebu Provincial Board Member Celestino Martinez III, kanhi Bogo Municipal Accountant Crecensio Verdida, kanhi Bogo Municipal Treasurer Rhett Minguez, GSP Bookeeper Rhodariza Kilantang, kanhi GSP Treasurer ug kasamtangan nga Kongresista sa Lone District sa dakbayan sa Lapu-Lapu Paz Radaza, ug kanhi GSP cashier Julieta Quiño.
Gihukman sila si Clavel Martinez, Celestino Martinez III ug Crecensio Verdida nga mabilanggo gikan sa dili mominus 10 ka tuig ngadto sa 18 ka tuig nga maximum ug pamultahon og tag P7.1 milyones matag usa ug susamang pagkabilanggo sa ikaduhang kaso nga may multa usab nga P7.3 milyones.
Sila si Minguez, Kilantang, Radaza ug Quiño mabilanggo sa dili mominus 10 ka tuig ngadto sa 17 ka tuig nga maximum ug susamang pagkabilanggo sa ikaduhang kaso nga may multa nga P7.3 milyones
Gimandoan ang mga akusado nga ipauli ngadto sa panudlanan sa gobyerno ang P7.1 milyones sa unang kaso ug P7.3 milyones sa ikaduhang kaso uban sa interest.
Sagubangon usab nila ang perpetual disqualification sa pagdagan sa bisan unsang pampubliko nga posisyon ug dili makadawat sa mga benepisyo sa ilang pagretiro subay sa balaod.
