Gipahayag ni Former Cebu Governor Gwendolyn Garcia ang iyang dakong pagtagad sa pagtabang ug pagpauswag sa kinabuhi sa katawhan nga nanginahanglan, ug nga wala niya huna-hunaa sa pagkakaron ang pagbalik sa politika alang sa 2026 National and Local Elections ug nakapukos kini sa paghatag og paglaum sa katawhan pinaagi sa libreng edukasyon isip iyang kabilin.
Kini human iyang gipahibalo sa publiko ang bag-ong gitukod nga GFG Institute nga nagtanyag og mga libreng skills ug trainings alang sa gustong magkat-on ug mga courses sama sa Healthcare, AI and Digital Marketing, Creative Media and Content Creation, ug sa Beauty, Wellness, and Salon Management.
Dugang pasabot sa kanhi gobernadora nga imbes nga maghuna-huna sa pulitika sa tuig 2028, mas pilion niyang huna-hunaon ang tuig 2058, diin matod pa niya nga sa maong tuig, wala na man tuod siya, apan ang importante mao ang pamana o legacy nga iyang ibabilin para sa umaabot nga henerasyon.
Gidugang pa niya nga dili lang kini bahin sa pag-ihap sa iyang mga termino isip gobernador, kundili bahin sa pagtan-aw kon unsa ka dako ang kausaban sa kinabuhi sa mga pamilya pinaagi sa mga opurtunidad nga gitanyag sama sa GRG Institute.
Ang bag-ong inisiyatiba ni Garcia naumol kini sa pakigtambayayong sa TESDA, Vicente Sotto Memorial Medical Center, Salon de Rose, ug sa uban pang mga propesyonal.
Gikanayon usab niya nga aduna nay laing branch niini sa Ormoc City ug nag-abli niadtong milabayng, ug mga bag-ong kurso nga bag-ohay rang giaprubahan sa TESDA VIII.
Midasun si Garcia nga pinaagi niini mas makatabang ug makahatag sila og paglaum ngadto sa mga gustong magkat-on aron sila makakita ug panginabuhian hilabi na sa panahon sa krisis, butang nga gahinan og oras ni Garcia kaysa magpukos sa pagpamulitika.
