TALISAY CITY, CEBU- Napalgang patay ang gidudahang notadong kawatan sa halapad nga kasagbutan sa Purok Kawayan, Barangay Jaclupan, dakbayan sa Talisay kagahapon sa buntag, Lunes Oktubre 28, 2024.
Giila ang biktima nga si Ramesis Gabutan o mas giila sa alyas “Cocoy”, 27-anyos ug lumulupyo sa Purok Avocado sa samang barangay ug dakbayan.
Matod pa sa Talisay City Police Station nga nadawat nila ang taho nga adunay patayng lawas sa maong dapit human adunay mitawag sa ilang hotline.
Asoy pa nga bag-o lang nakagawas gikan sa prisohan ang biktima tungod sa kasong paghupot og ginadiling drogas.
Daling girespondihan sa mga kapulisan sa maong dakbayan ang lugar kung asa napalgan ang patayng lawas ang adunay samad-pinusilan nga maoy gitumbok nga hinungdan sa kamatayon.
Sa pamahayag ni Police LtCol Epream Paguyod, ang hepe sa Talisay City Police nga padayon pa ilang imbestigasyon sa pagsubay sa kun kinsay responsible sa krimen.
