Temporaryo nga gibuhian si kanhi Negros Oriental 3rd District Cong. Arnulfo Teves Jr. gikan sa Becora Prison sa Dili, Timor Leste.
Nagpabilin si Teves sa maong prisohan alang sa iyang preventive detention o precautionary detention, human sa iyang pagkadakop niadtong Marso sa Dili.
Diin una kining giisyuhan og “red notice” sa International Police tungod sa giingong kalambigitan sa pagpatay kang kanhi Negros Oriental Governor Roel Degamo ug siyam pa ka indibidwal.
Matod ni Atty Ferdinand Topacio, legal counsel ni Teves, ang kanhi magbabalaod gibuhian sa wala pa ang iyang extradition tungod kay ang hangyo sa gobyerno alang sa extradition ni Teves dili subay sa naandan nga praktis ug naandang internasyonal nga balaod.
Dugang pa ni Topacio, nga gideklarar nga ilegal ang iyang pagkatanggong.
Ingon man nga aduna pa’y pipila ka judicial proceedings nga kinahanglang agian ni Teves alang sa padayon niyang pagpabilin sa Timor Leste ug sugdan kini karong adlawa.
Gisiguro usab niini ang presensiya ni Teves, uban sa daghang mga testigo, lakip na si kanhi Human Rights Commissioner Wilhelm Soriano nga morepresentar isip eksperto sa tawhanong katungod.
