Gibutyag sa upat ka kanhing bodyguard ni kanhing Ako Bicol party-list Rep. Elizaldy “Zaldy” Co nga ang gitawag nga “18 Maleta Boys” giingong giumol aron mang-blackmail ug mang-extort batok sa pipila ka prominenteng politiko ug taas nga opisyal sa gobyerno, ilabina may kalabotan sa paghatod sa kuwarta gamit ang mga maleta.
Kahinumduman nga upat sa 18 ka kanhing bodyguard ni Co ang mibawi sa ilang mga naunang akusasyon batok kang President Ferdinand Marcos Jr., Leyte Rep. Martin Romualdez ug Co.
Matud nila, nadiskobrehan nila sa ulahi nga ang katuyoan sa ilang grupo mao ang pagpang-blackmail ug pagpang-extort batok sa pipila ka prominenteng personalidad.
Sa ilang bag-ong gipanumpaang mga pahayag, ilang giingon nga nag-usab-usab ang mga ngalan sa mga personalidad nga nalambigit sa mga alegasyon.
Usa sa mga kanhing bodyguard miingon nga ang tumong mao ang paghimo og impresyon nga nakadawat og kuwarta gikan ni Co ang mga personalidad nga ilang giakusahan.
Giakusahan usab nila ang ilang abogado nga si Atty. Levito Baligod nga misaad og dakong kantidad sa kuwarta kung molampos ang maong plano.
Hugot kining gihimakak ni Baligod ug gitawag ang mga alegasyon nga “layo sa tinuod.”
Gilimod usab ni Baligod nga nagsaad siya og kuwarta baylo sa pagpirma sa mga affidavit.
Matud niya, iyang gisulti lamang sa grupo nga andam siyang motabang kung adunay problema ang ilang mga pamilya.
Samtang, si George Villalon, usa sa mga kanhing bodyguard nga nagpabilin sa iyang orihinal nga pamahayag, miinsistir nga tinuod ang ilang naunang mga alegasyon.
Matud niya, ang upat ka saksi nga mibawi sa ilang mga affidavit giingong gitanyagan og ₱20 milyon ngadto sa ₱25 milyon matag usa aron bawi-on ang ilang testimonya.
Giingon usab ni Villalon nga gitanyagan usab siya og kuwarta apan iyang gibalibaran.
Padayon ang paningkamot sa Bombo Radyo nga makakuha og reaksyon gikan sa ubang mga personalidad nga nalambigit sa isyu.
