CEBU CITY – Padayon ang pagpangita sa kapulisan sa duha ka mga tulisan kinsang nagmalampuson sa pagsakiyo sa kapin 2 milyones nga kantidad sa mga alahas sa Montaña Pawnshop sa dakbayan sa Danao kagahapong adlawa.
Gibutyag ni SPO1 Cherry Pañares, ang imbestigador sa Danao Police Station, nga basi sa ilahang imbestigasyon, planado na ang maong pagpanglungkab basi na usab sa mga traces nga ilahang nakita.
Matud pa nga ang mga suspetsado ang upat na kaadlaw nga naka-check-in sa usa ka lodging house nga duol sa pawnshop.
Giingong basi sa ilahang nakita nga bangag sa kwarto kung diin nag-stay ang mga suspetsado, didto kini lusot paingon sa pawnshop kung diin adunay bangag usab nga nakita sa may volt diin anaa ang mga alahas.
Dugang pa ni Pañares nga posibling electric drill ang gigamit sa mga suspetsado sa pagbangag ug giingong gumikan kay construction site ang tupad sa maong lodging house hayan dili madungog ang kalihokan sa duha.
Nakuha sa mga suspetsado ang mga assorted jewelries nga nagkantidad og kapin 2 milyones ka pesos, mga penerenda nga relo nga nagkantidad og 50,000 ka pesos ug 2,000 ka pesos nga cash.
Sa pagkakarun, gipalapdan na sa kapulisan ang ilahang imbestigasyon diin gisusi karun nila ang mga CCTV footages nga kuha usab gikan sa pawnshop.
