CEBU CITY — Apektado ang gatusan ka mga pamilya human niulbo ang dakong sunog kaganihang kaadlawon sa Sitio Ipil, Brgy. Basak San Nicolas, dakbayan sa Sugbo.
Base sa inisyal nga imbestigasyon, anaa na sa 74 ka mga panimalay ang naugdaw ug kasamtangan pang gisuta kung unsa man ang nahimong hinungdan niini.
Nagtinabangay ang mga kabumberuhan sa dakbayan sa Sugbo, ingon man ang mga kasikbit niining fire station sa pagpalong sa dakong kalayo ug milanat kini ngadto sa kapin duha ka oras.
Read more: Ancestral house nasunog; kapin 70 balay nadamay
Giingong nagsugod ang maong sunog sa panimalay ni Jonathan Estrella apan gihimakak hinuon ang pasangil gikan sa mga silingan.
Nikabat ngadto sa P600,000 ang danyos sa dakong sunog sa maong residential area.
‘Tabang sa nasunugan’
Gi-atiman sa Department of Social Welfare and Services (DSWS) ang halos 100 ka mga pamilya o 367 ka mga indibidwal nga apektado sa dakong sunog sa Brgy. Basak San Nicolas.
Matud sa head sa DSWS nga si Dr. Jeffrey Ibones nga i-evaluate pa sa ilang buhatan ang listahan sa mga nasunugan aron mahatagan og hinabang gikan sa kagamhanan sa dakbayan.
Naka-standby na usab ang mga food packs alang sa mga nasunugan nga namakwit sa Alumnus Gymnasium.
Subayon pa usab ni Mayor Edgardo Labella ang kahimtang sa mga nasunugan, ingon man ang posibleng lakang sa habig sa City Government.
