Nakalaya na ang anaa sa 109 ka mga Persons Deprived of Liberty (PDLs) human nakapasar kini sa Good Conduct Time allowance (RA 10592) sa Bureau of Jail Management and Penology (BJMP) sa dakbayan sa Mandaue karong Lunes, Disyembre 22, 2025.
Ang programa sa Mass Release kay gihaom sa tema sa kapaskuhan diin nagsabak kini sa pamulong nga “Paglaum ug Bag-ong Sugod: Pasko sa Kagawasan” sa GCTA-Based Release and Reintegration Ceremony sa pasilidad.
Adunay 108 ka mga lalaki ug usa ka babaye nga mga kanhi binilanggo ang nakalaya sa maong programa nga gikan sa Mandaue City Jail Male Dormitory sa Sitio Dunggoan, Barangay Basak sa dakbayan sa Mandaue.
Gani atol sa eksklusibong pakighinabi sa Bombo Radyo Cebu News Team kang Jail Superintendent Jessie Gingoyon, ang Jail Warden sa Mandaue City Jail Male Dormitory nga ang maong programa kay nagtala sa pinakadakong Mass Release program sa BJMP sa tibuok Pilipinas.
Anaa sa 90% sa mga PDLs kay nag-atubang sa kasong kalapasan sa RA 9165 o Comprehensive Dangerous Drugs Act of 2002 nga karon makasugat sa kapaskuhan kauban ang ilang mga kaugalingong pamilya tungod sa maayong pamatasan sulod sa prisohan sa pipila ka katuigan.
Nagsulbad pud ang programa sa congestion problem sa prisohan diin dakong tabang kini sa pagpaluwag sa operasyon sa pasildad.
