Naugdaw ang kapin sa 100 ka mga balay sa usa ka dakong sunog sa siyudad sa Drammen sa Norway, matod sa mga rescue worker ug lokal nga otoridad.
Giputos sa baga nga itom nga aso ang maong dapit, nga may gilay-on nga 50 kilometros gikan sa kaulohang Oslo.
Bisan pa sa kadako ug kakusog sa maong sunog, maayo na lang kay walay gitaho nga namatay o nawala nga mga residente sa insidente.
Mukabat sa 60 ka mga bombero ang dinalian nga gipadala aron pakunhuran ug mapalong ang kalayo, samtang gigamit usab ang mga helikopter aron magbubo og tubig gikan sa kahanginan aron mapugngan ang dugang pag-ulbo niini.
Tungod sa kusog nga hangin, paspas nga mikaylap ang kalayo ug nakaabot pa gani sa duol nga kalasangan, hinungdan nga gipabakwit sa mga awtoridad ang gatusan ka mga lumulupyo.
Padayon pa nga giimbestigahan sa mga otoridad ang tinuod nga hinungdan sa sunog, samtang gisusi pa usab ang kinatibuk-ang kantidad sa danyos nga gibilin niini.
